ఉందో లేదో స్వర్గం

రచన : తటపర్తి రాజగోపాలన్

గానం : గజల్ శ్రీనివాస్

ఉందో లేదో స్వర్గం నా పుణ్యం నాకిచ్చెయ్
సర్వస్వం నీకిస్తా నాబాల్యం నాకిచ్చెయ్

అమ్మ గుండెలోదూరి ఆనందంతో తుళ్ళి
ఆదమరచి నిదరోయే ఆ సౌక్యం నాకిచ్చెయ్

కేరింతలతో కుదిపి బుల్లిబొతలు తడిపి
ఊయల కొలువులు ఏలే ఆ రాజ్యం నాకిచ్చెయ్

చెత్తను వేసెబుట్ట ఆట సామను పుట్ట
విరిగినవన్నీ నావే నా మాన్యం నాకిచ్చెయ్

అమ్మ లాలనకు ముందు బ్రహ్మ వేదాలుబందు
ముక్తికేలనే మనసా బాల్యంకోసం తపస్సుచెయ్

సూచిన వన్నీ కోరుతూ ఏడుస్తుంటే రాజా
అమ్మ పెట్టిన తాయిలం ఆ భాగ్యం నాకిచ్చెయ్

youtube link for you

http://www.youtube.com/watch?v=hF96kq59_nE

ఉదయా'నందం - ఘజల్

ఉదయ్ కుమార్ 

ప్రేమ ఇంత మధురమని తెలిసింది నిన్ను నేడు కలిసాక
నిర్మలంగా ఉంది చూడు ఆకాశం వాన కాస్త వెలిసాక

అహం పొరలు కమ్మితే మంచేది మరి చెడ్డేది
మానవత్వం పరిమళించదా సోహం అంటే తెలిసాక

ఎవరెస్ట్ ఎక్కినా సరే దొరకని అపరిమితానందం ఎక్కడ
కన్నతల్లి కళ్ళల్లో కొడుకు ప్రయోజకుడయ్యాడనే మెరుపు మెరిసాక

కల్లబొల్లి కబుర్ల బాతాఖానీలకే కన్నె పిల్లలు కరుణించేది
కనబడరు బాబూ కంటికి కాస్త ఆ ముచ్చటేదో మురిసాక

పొద్దస్తమానం పనికిమాలిన రాతలతో ఎందుకీ ' ఉదయా'నందం
పరవశించదా మది రసజ్ణుల ప్రశంసల జల్లులో నిలువెల్లా తడిసాక

ఎలా మరవడం

తనువంతా మేఘమై తడిపిన కాలాన్ని ఎలామరవడం ?
జ్ఞాపకమైన రాగమేదో పదేపదే వినబడితే ఎలామరవడం?

కరుణించే కన్నుల్లో కదలిసాగిన అలలన్నీ
కాగితపు పడవలైన బాల్యపు అడుగులన్నీ ఎలా మరవడం?

వల్లప్పల పాటలలో కలిసి ఆడిన స్నేహహస్తం
సవ్వడిచేసే గానమై వెనువెంటే రావడం ఎలా మరవడం?

చిరుజల్లులలో ఏరిన ముత్యాల చినుకులు
చెలిచెక్కిలిపై నడయాడి మెరవడం ఎలా మరవడం?

సంధ్యకెదురైన చుట్టం వాలుసంధ్యలో వర్షం
రాత్రి విడువని జ్ఞాపకమై వేకువకెటోవెళ్తే ఎలా మరవడం?

తడిపొడి చినుకుల్లో తడబడు అడుగుల్తో
కదిలే పాలరాతి శిల్పాన్ని మరిపించడం ఎలా మరవడం?

ఉరిమిన ఉరుములలో భయపెట్టిన జాడలు

ఎదిగిన వయసునేర్పిన ధైర్యపు మూటలు  ఎలామరవడం!

కలలాగా సాగిన మబ్బులవెంట పయననం
"జాను"పాడేగీతికల్లో మురిసిన అనుభవాన్ని ఎలా మరవడం?

సురేష్ వంగూరీ || గజల్... నేనేనా

సురేష్ వంగూరీ || గజల్... నేనేనా

తన ఊహే ఊరటగా శ్వాసిస్తూ నేనేనా
తన ప్రేమే బాసటగా భాసిస్తూ నేనేనా

ఉరుకులుగా ఊసులన్ని కుమ్మరించి పోతుంది
తీరికగా ఒక్కొక్కటి ధ్యానిస్తూ నేనేనా

మురిపెంగా కోపిస్తూ మృదువుగా నను తోస్తుంది
ఒకే స్పర్శ వంద సార్లు అనుభవిస్తూ నేనేనా

ఒక్క చిన్న మాట కూడా ఓర్వలేని ముక్కోపిని
చిత్రంగా ఓరిమిలో రాణిస్తూ నేనేనా

ఎంత మారిపోయావో తెలుస్తోంది వంగూరీ
తన కోసం తనలాగా పరిణమిస్తూ నేనేనా

21. 9. 2012

సురేష్ వంగూరీ || గజల్... యుద్ధం

నీలోపల నీ పైనే యుద్ధం చేయాలి
నీవేంటో మరి నీకే అర్ధం చేయాలి

అహం అస్తమిస్తేనే అసలు సిసలు ఉదయంరా
తడి తెలియని హృదయాలను చిధ్రం చేయాలి

చరితంటే కాలాలూ రాజ్యాలూ యుద్ధాలా
గెలిపించిన గాయాలను భద్రం చేయాలి

నిలవున్డిన విలువలను నినదించకు వంగూరీ
ప్రవహించే ప్రశ్నలతో శుభ్రం చేయాలి

కోదండరావు - గజల్

ఏ నాటకమైనా ముగిసిందా ఏదో వాదన లేకుండా!!!
ఏ జీవితమైనా గడిచిందా ఏదో వేదన లేకుండా!!!

కలల్లోనే గడిపేస్తుంటే.. కీర్తిశిఖరం అందుతుందా
ఏ దేశమైన పురోగమించిందా ఏదో సాధన లేకుండా!!!

నీళ్ళైనా నిలకడగుంటే.. రాళ్ళల్లో నాచు మొలవదా
ఏ ధర్మమైన జన్మించిందా ఏదో శోధన లేకుండా!!!

యంత్రం ఎంత గొప్పదైనా... తానుగా నడవదులే
ఏ పాపడైనా పుడతాడా ఏదో దీవెన లేకుండా!!!

జాబిల్లి వెన్నెల చల్లితే...కలువ మురియదా "కోదండ"
ఏ మనసైనా ప్రేమిస్తుందా ఏదో స్పందన లేకుండా!!!

వలపు - ఘజల్

| 

ఈడూరి శ్రీనివాస్ 

నీ వలపు మది తాకిన సమీరం లాగుంది
ఆ తలపు నను వీడని భ్రమరం లాగుంది

నీ చూపు తాకగానె శిలనైన నాకు
కన్ను కన్ను కలపడమే సమరం లాగుంది

ప్రేమ అనే పదానికి ఇంత పటిమ ఎక్కడిదో 
ఆ ఊహే వేసవిలో శిశిరం లాగుంది

ఎంత కాదన్నా నీ వెంటే నడుస్తున్నా 
నీ తీరే అసమ్మతి శిబిరం లాగుంది

ఇన్ని నెలల నిరీక్షణ ముగిసేనా తొందరలో 
నీ వాలుచూపు ప్రేమాలయ శిఖరం లాగుంది

చెరిగిపోని ప్రణయాలు చరిత్రలో ఎన్నున్నా
ఈడూరీ, నీ కధ అమరం లాగుంది

కె. కె. - రాసిన గజల్

కె. కె.

ఒక పెద్దాయన షష్టిపూర్తి సంధర్బంగా నేను రాసిన గజల్ ఇక్కడ మీ కోసం...

****

పెళ్ళీనాటి జ్ఞాపకాల మల్లెలు, దాచుకో ఒక్కొక్కటే!
అందమైన అనుభవాల మువ్వలు, కూర్చుకో ఒక్కొక్కటే!!

ఊగే జుంకాలతో, విసిరే అరనవ్వుతో.. కళ్ళుచేసే బాసలెన్నో
పెళ్ళిచూపుల నాటి మాటలు, పంచుకో ఒక్కొక్కటే!!

ఆశీర్వచనాలతో, ఆనందపు నీళ్ళతో, కన్నవారి కళ్ళ కాంతులెన్నో
మార్చుకున్న తాంబూల గంధాలు, ఎద రాసుకో ఒక్కొక్కటే!!

తెరచాటు మాటున అరచేతులు ఉంచిన, అక్షింతల జల్లులెన్నో
మంత్రాలు ముడివేసిన ఘడియలు, తలుచుకో ఒక్కొక్కటే!!

అరమోడ్పు కన్నుల బిడియాల మాటలు, పూల మాటు గుస,గుసలెన్నో
పంచుకున్న తమలపాకు చిలకలు, నెమరేసుకో ఒక్కొక్కటే!!

ఆరుపదులు దాటినా కోదండ, ఆరని సుగంధమేలే ఈ ప్రేమ
మనసులు శృతిచేసుకున్న గీతాలు, పాడుకో ఒక్కొక్కటే!!

నీకెవరు నేర్పారు?

ఆకురాలిన శిశిరానికి   కోకిలగాన మెవరునేర్పారు?  మబ్బుకమ్మిన మనసుకు నెమలినాట్య మెవరునేర్పారు?    ఊపిరి ఊగిసలు ఊయలూగే ఉయ్యాలలో    స్వరగతుల వేణుగాన మవ్వడమెవరునేర్పారు?   బడికెళ్ళిన బాల్యం కన్నువిప్పిన వేళలో  సొగసులెరిగి సిగ్గు మొగ్గవ్వడమెవరు నేర్పారు?   తూలిపోయే నడకనేర్చిన జీవన పథాలలో  పదుగురెరిగే పరుగులవ్వడమెవరునేర్పారు  దిక్కులెటు కనిపించని దృక్కులన్నిటిలో   మదినిండిన సిరులవానలో తడవడమెవరునేర్పారు  పదనిసలు తెలియని పదాల రాగలలో జానుతెలునుగు పాటై ప్రవహించడం నీకెవరునేర్పారు?    -----------------------------------------------------జాన్ హైడ్ కనుమూరి

మిత్రమా!!! - గజల్ కోదండ రావు గారి రచన

 ఈ గజల్ కోదండ రావు గారి రచన 
 వారి బ్లాగు నా కవిత

అందనిదేదో అందుతుందని అపేక్షించకు మిత్రమా!!!
అందినదాన్ని అందుకునేందుకు ఉపేక్షించకు మిత్రమా!!!

ఒరుసుకుందని రాళ్ళమద్యన ఏటిపయనం ఆగునా
దాతలకోసం చేతులుచాచి నిరీక్షించకు మిత్రమా!!!

సమ్మెటేస్తే బండరాయిలే ముక్కలవ్వక ఆగునా
మాటి,మాటికి మనసునైనా పరీక్షించకు మిత్రమా!!!

తాడుతోటి బిగించి లాగితే కొండకుదురులు వచ్చునా
ప్రజ్ఞలేని ప్రయత్నమెప్పుడు సుభీక్షించదు మిత్రమా!!!

చేదుగుళికలు ఎన్నిమింగిన చెదరకోయ్ 'కోదండ'
గడచిపోయిన పీడకలలను సమీక్షించకు మిత్రమా!!!

*****

వారి బ్లాగు 

http://www.naa-kavitha.blogspot.in/

నే ఓడిపోతుంటానులే! - గజల్

నిన్నే దాటిపోవాలని చేసే ప్రయత్నంలో నే ఓడిపోతుంటానులే!
నన్ను నడిపే నా నావికవని మరచి నే ఓడిపోతుంటానులే!

నా కనుసన్నలలో నడిపించి  అడుగులకు మడుగులొత్తే
జవదాటని  కొంగున ముడివేయాలని నే ఓడిపోతుంటానులే!

అనురాగానికి పదములల్లి  పలికే పలుకులెల్ల
నా అడుగు జాడలలో నడిపించాలని  నే ఓడిపోతుంటానులే!

ఎగబ్రాకే కొమ్మ రెమ్మలకు  జీవన వూతమైనిలిచి
శిఖరమెక్కిన చోట్ల   చిగురునవ్వాలని  నే ఓడిపోతుంటానులే!

నాకు నువ్వు నీకు నేననని తలపు మరచిన వేళ
 సహనపు చూపుల కొండనెదుర్కోలేక  నే ఓడిపోతుంటానులే!

నర్తించే పాదాలకు ఆంక్షల  సంకెళ్ళు వేయాలనుకుంటూ
కరుణనిండిన కౌగిలిలో కరిగి కరిగి  నే ఓడిపోతుంటానులే! 

కలిసి నడిచే  ఏడడుగుల్లో కలవని మాటలెన్నో
ఇమడ్చలేక సతమతమౌతూ నిరంతరం నే ఓడిపోతుంటానులే!

ఒకరినొకరు అధిగమించే ఆదిపత్యాల మధ్య
గెలుపు ఓటమి లేవని తెలుకోలేక నే ఓడిపోతుంటానులే!

ఏకమయ్యే  జాడమరచి నేను నువ్వని పెదవి విరచి
ఆజానుబాహువైన  నీ ప్రేమ ఎదుట  నే ఓడిపోతుంటానులే!



జాన్ హైడ్ కనుమూరి
-----------------------------------------------------------
27.03.2012 between 21.00 and 23.30 hours