బోసినవ్వు విసురుతాడు, మంచు కురిసినట్లుగా,
చిన్నిముద్దు చిలుకుతాడు,మనసు తడిసినట్లుగా,
విరిగినవి, చిరిగినవి పారేస్తుంటే,
భద్రంగా దాస్తాడు, నిధులేవో దొరికినట్లుగా,
అరచేతిని ఆకుచేసి, అన్నం పెడుతుంటే,
నలుమూలల తిరుగుతాడు, తననెవరో తలచినట్లుగా,
ముద్దు,ముద్దు మాటలతో కధలే చెబుతుంటే,
ప్రశ్నలెన్నో అడుగుతాడు, నా మనసే అలసినట్లుగా,
నా చేతిని ఊతచేసి, నడిపిస్తుంటే,
పరుగులు పెడుతుంటాడు, జగమంతా గెలిచినట్లుగా,
అందమైన అల్లరితో అలరిస్తుంటే,
కలుసుకో కోదండ, నీ బాల్యం పిలిచినట్లుగా
