బి. ఇందిర(ఇల్లందు)
మనిషిని మనిషే చంపే వాదం - ఇంకా యెన్నాళ్ళు
ఏ పరమార్థం కోరని క్రోథం - ఇంకా యెన్నాళ్ళు!
సాంత్వన తీర్చే సాయం సంధ్యలు పలికే గీతికలో
నరాలు తెంపే విషాద నాదం యింకా యెన్నాళ్ళు
ద్వేషం అంటే తెలియని ఆశా జీవులె అందరూ
అమాయకులపై హింసా వాదం యింకా యెన్నాళ్ళు
పేరేదైనా మానవ జాతికి వేరొకటి కాదా
మనుగడ కొమ్మన మనలో బేధం యింకా యెన్నాళ్ళు
రేపటి వేకువ కోసం సాగే అడుగులు ఇందిరా
పొంచిన మృత్యువు ఆడే జూదం యింకా యెన్నాళ్ళు
